ភ្នំពេញ: លោក វ៉ា គឹមហុង ប្រធានគណៈកម្មាធិការទទួលបន្ទុកកិច្ចការព្រំដែន របស់រាជរដ្ឋាភិបាលកម្ពុជានៅថ្ងៃទី១៩ ខែមិថុនា ឆ្នាំ២០១០ បានមានប្រសាសន៍ថា ពុំមានអាជ្ញាធរវៀតណាម ចូលមកហាមឃាត់កសិករខ្មែរ មិនឲ្យធ្វើស្រែនៅលើដីស្រែរបស់ពួកគាត់ទេ គឺអាជ្ញាធរស្រុកបុរីជលសាខេត្តតាកែវ ជាអ្នកធ្វើការហាមឃាត់កសិករខ្មែរនៅ ភូមិអញ្ចាញ ឃុំជ័យជោគ កុំឲ្យចូលទៅធ្វើស្រែនៅក្បែរតំបន់បោះបង្គោលព្រំ ដែនកម្ពុជា-វៀតណាម និងមិនអនុញ្ញាតឲ្យចូលទៅធ្វើស្រែ នៅក្បែរតម្រុយបង្គោលព្រំដែនលេខ២៧០ នោះជាបណ្តោះអាសន្ន ពីព្រោះអាចរំខានដល់ការងាររបស់ក្រុមអ្នកជំនាញការបច្ចេកទេសព្រំដែន កំពុងតែធ្វើកិច្ចការនៅតំបន់នោះ ។ ទោះជាយ៉ាងនេះក្ដីលោកអះអាងថា តំបន់ក្បែរតម្រុយបង្គោលព្រំដែនលេខ ២៧០ សុទ្ធតែវាលស្មៅគ្មានដីស្រែ ប្រជាពលរដ្ឋខ្មែរឡើយ ។
លោកទេសរដ្ឋមន្ត្រី វ៉ា គឹមហុង បានមានប្រសាសន៍ថា តម្រុយបង្គោលព្រំដែនលេខ២៧០ ស្ថិតនៅភូមិអញ្ចាញ ឃុំជ័យជោគ ស្រុកបុរីជលសា នោះ ក្រុមបច្ចេកទេសបោះបង្គោលព្រំដែន មានគម្រោងសាងសង់ជាបង្គោលថ្ម តែបច្ចុប្បន្ននេះតម្រុយបង្គោលព្រំដែនលេខ២៧០ គឺទើបតែបោះជាតម្រុយបង្គោល ពីឈើមានកម្ពស់កន្លះម៉ែត្រ (២៥ឧសភា២០១០) ប៉ុណោះ ។
លោក វ៉ា គឹមហុង មាន ប្រសាសន៍បញ្ជាក់ទៀតថា កម្ពុជា-វៀតណាមមានព្រំដែនគោក ចម្ងាយ១.២៧០គីឡូម៉ែត្រ ហើយភាគីប្រទេសទាំងពីរបានព្រមព្រៀង បោះបង្គោលព្រំដែនគោកបានចំនួន១៩០ បង្គោលរួចហើយក្នុងចំណោម ៣៧៥ បង្គោលដែលប្រទេសទាំង ២ បានព្រមព្រៀងគ្នាបោះដោយធ្វើបង្គោលអំពីថ្ម សាងសង់តាមលក្ខណៈបច្ចេកទេស រក្សាឲ្យបានរឹងមាំយូរអង្វែង ។
ក្រុមគណបក្សប្រឆាំង និងក្រុមប្រឹក្សាឃ្លាំមើលកម្ពុជាបានព្យាយាមចុះ ទៅពិនិត្យតម្រុយបង្គោលព្រំដែនលេខ ២៧០ នៅភូមិអញ្ចាញ ឃុំជ័យជោគ ស្រុកបុរីជលសា ខេត្តតាកែវ ប៉ុន្តែត្រូវបានប្រជាពលរដ្ឋនៅតំបន់នោះក៏ដូចជា អាជ្ញាធរខ្មែរការពារព្រំដែនវរៈ ៦០៣ បានធ្វើការហាមឃាត់ ។ មន្ត្រីអ្នកនាំពាក្យគណបក្សប្រឆាំងបានចោទប្រកាន់ថា ការបោះបង្គោលព្រំដែនគោករវាងកម្ពុជា-វៀតណាម ស្ថិតក្នុងភាពលាក់កំបាំង ហើយតំបន់ខ្លះចូលក្នុងទឹកដីខ្មែរ ប៉ះពាល់ដីស្រែកសិករតាមបណ្តោយព្រំដែន ៕
Source: Cambodian Express News
loading 
0 comments:
Post a Comment